Anarâškielâ já -kulttuur

Luuhâmive 2019 - 2020 Säämi máttááttâskuávdáš uárnee oovtâst Oulu ollâopâttuv Giellagas-instituut já šoddâdemtiettuu tieđâkode Ketterä korkeakoulu -haaváin anarâškielâ vuáđu- já amnâsuápuid (25 uč + 35 uč).

Škovliittâs lii uáivildum puohháid kiäid kiäsut anarâškielâ já toid, kiäh halijdeh nanodiđ jiejâs kielâmáátu. Uápuh láá meid pyeri valjim toid, kiäh máttáátteh teikkâ halijdeh puátteevuođâst máttááttiđ anarâškielâ tâi anarâškielân.

Anarâškielâ uápuh älgih algâuápuin, adai tun jieh taarbâš ovdil mättiđ anarâškielâ.

Uáppuvaljiimân kulá sahhiittâllâm. Äigitaavlust almottuvvoo occeid sierâ.

Tot kii uásálist uáppoid Säämi máttááttâskuávdáá uáppen puáhtá luuhâđ ollâopâttâhuápuin A) sehe vuáđu- já amnâsuápuid TÂI B) vuáđu-uápuid já uási amnâsuápuin TÂI C) taid kuursâid maid sun taarbâš. Jis uáppee lohá ollâopâttâhuápuin tuše uási, te sun tievâsmit jieijâs uápuid Säämi máttááttâskuávdáá faallâm anarâškielâ já -kulttuur uápuiguin. Kurssâfalâlduvâst puátá eenâb tiätu ko uápuh láá älgimin.

Uáppee puáhtá, jis sun maŋeláá ocá já piäsá luuhâđ ollâopâttâhân, uuccâđ uápuidis pyerrinluuhâm Oulu ollâopâttuv Giellagas-instituutist.