Tiätu- já viestâdemtekniik vuáđutođhos, ohjelmij pyevtittem mättimsyergi
Lijkkuuh-uv tun keevâtlii paargon tiätumašináin? Halijdah-uv tiettiđ, magareh teknisiih ääših láá nettisijđoi já heiviittâsâi tyehin? Halijdah-uv puorijd máhđulâšvuođâid kavnâđ pargosaje? Halijdah-uv valmâštuđ jotelâvt uđđâ áámmátân?
Säämi máttááttâskuávdáš uárnee datanomškovlim Anarist uđđâ toimâsaajeest. Jis tust lii eres tođhos teikkâ luvâttâhuápuh valmâšin, te uápuid lii máhđulâš čođâldittiđ kyevti ivveest teikkâ vala jotelubbooht.
Škovliittâsâst tun ovdedah tiätuteknisii mättim já pyeredah pargomáhđulâšvuođâid. Halijdah-uv porgâđ vuávám, ohjelmij pyevtittem, äššigâspalvâlem teikkâ vyebdim tiätumašijnijgijn? Škovlim mättimsyergi lii ohjelmij pyevtittem. Uápuh láá keevâtlâš porgâm tiätumašijnijgijn. Tun oopah iärásij lasseen speelâi já www-heiviittâsâi pyevtittem sehe jieškote-uvlágánij išeohjelmij instâllistem já kevttim.
Tiätu- já viestâdemtekniik škovlimohjelm taha máhđulâžžân meid uuccâđ jotkâuáppoid, om. áámmátollâškoovlân teikkâ ollâopâttâhân.